Ich Reynhart von Holbach zcu Vrowicz geseßen bekenne uffelichen mit deßem uffen briffe, daz vor myr daz clostir | zcu der Pauline Celle der apt unde covent unde Bertolt Berldis burger zcu Blanckenberg sich gutlichen geeynt unde gericht haben | umme dy grenicz unde marcke zcwisschen dem Manffeldere unde dem Erfenberge, also daz su uff beide syten sullen abe | thu alle boyme, dy den wingarten schedelich synt, usgeslossen dy myspelboyme, dy da yczunt steyn unde vordir mer sullen su uff beide partige su unde alle ore nachkamen keyne boyme me zcuge dy den andern schedelich weren zcu oren wingarten unde der grabe der zewissen den gnanten wingarten liet, der sal zcu den beiden wingarten dyne uff ixliche partige zcu orme nucze. Und wanne der grabe fayns bedarff, so sal is eyn partige der andern vorkundige unde sullen den graben danne vage mit glichir erbeit unde dy erde sal geteilt werde glich in beide wingarten. Were ouch, daz eyn partige der andern nicht wolde helfe den graben vhage, welche partige danne den graben vayte, dy sulde der erden gebruche unde werffe genczlichen in oren wingarten. By der obgnanten eynnunge synt gewest dy wysen Heynrich Berldis, Clawis Schuchworchte, Heynrich Gloczebog, Kerstan Rote, Herman Kerchener unde Clawis Zcegrem, burgere zcu Blanckenberg, dy da alle des ware gezcugen synt. Dess zcu orkunde habe ich gnantir Reynhart von Holbach myn insegil durch bete willen des obgnanten Bertoldis Berldis an deßen uffen briff gehengit.